2020 - 08 - 09

Gabonetako Kontzertua Elkargunean

GABON KONTZERTUA

Datorren ostiralean, abenduak 20,  arratsaldeko 6:30etan, Elkarguneko areto handian, lehen hiruhileko ekintzei amaiera emateko, gabonetako kontzertu berezi bat antolatu da. Bertan, parte hartuko dute, Klarinete taldea eta Gazte Banda Gorka Errezilen gidaritzapean. Egitarauaren zati handiena, gabonetako doinuekin osaturik egongo da. Gonbidapena luzatzen diegu bai gurasoei, bai ikasleei, baita herritar guztiei ere gabon jaien sarrera gisa ospatzen den emanaldi berezi honetara hurbiltzeko.

Pianoko ikasleen Entzunaldiak

piano entzun

Abenduaren 18an (asteazkena) eta 19an (osteguna) Bizkargi Musika eta Dantza Eskolako pianoko ikasleak lehenengo hiruhileko bi entzunaldi eskainiko dizkigute. Biak, arratsaldeko 19:00etan izango dira Elkarguneko Oteiza aretoan. Guztiok gonbidatuta zaudete!

BIZI DANTZA Ikuskizunean Bizkargiko 40 dantzarik parte hartuko dute

PIRRITX

Pirritx, Porrotx eta Marimototsen “Bizi Dantza” ikuskizunaren barne, musika eskolako 40 ikasleek (2 taldetan banatuta) parte hartuko dute zazpi dantza ezberdin dantzatuz saio bakoitzean. Guztira bi saio egongo dira, lehena arratsaldeko 4etan eta bigarrena arratsaldeko 6:30etan, Baztartxo antzokian, abenduaren 23an.  Sarrerak, abenduaren 12an. 17:30etik 19:30era jarriko dira salgai Baztartxo Antzokian. Prezioa 6€. Pertsona bakoitzeko, gehienez 6 sarrera eskuratu ahalko dira.  Hauxe da sinopsia:
“Lurra sortu zen unetik bertatik, jirabiraka dantzari hasi zen bere buruaren eta eguzkiaren inguruan.
Animaliak ere sortu ziren unetik bertatik, dantzari dabiltza lurraren inguruan.
Geu ere hitzaren jabe izan aurretik dantzatzen gara, zaldiak, izurdeak eta tximeletak bezala.
Pozak eta tristurak azaltzeko dantzatzen gara. Barruak agintzen digunean dantzatzen gara. Gure kultura ospatu eta errituak berritzeko. Garen hori mugimenduan jartzeko.
Zangoak luzatuz, gerria mugituz, hegoak astinduz eta ur azpian ere dantzatzen gara gu.
Zatoz gurekin dantzara, atera zure barruko animalia plazara!“
Leire Bilbao
Aktoreak:
PIRRITX-Aiora Zulaika
PORROTX-Joxemari Agirretxe
MARIMOTOTS-Mertxe Rodriguez
Oihana Sanchez
Izaskun Forcada

Ekoizpena: Katxiporreta Koop.
Zuzendaritza: Katxiporreta Koop.
Musika: Xabier Zabala, Leire Bilbao
Atrezzoa: Maite Mutuberria, Buruarinak (Ipuitantai S.L.) eta Katxiporreta.
Iraupena: 70 min
Familia-antzerkia: 0-100 urte

BIZKARGI abesbatzak, Arantzazuko “Gabon Kantak” kontzertuan parte hartuko du

Arantzazukoa

Debagoieneko abesbatzak eta Azkoitiko Musika Eskolako Bizkargi abesbatza Gabon gaueko protagonistak izango dira ETBn. Sei abesbatza batuko dira abenduaren 14an, Arantzazun, Gabon Kantak kontzertua eskaintzeko. ETBk emanaldia grabatuko du, eta Gabon gauean, abenduaren 24an emitituko dute telebistan. Fernando Velazquez konposatzailearen gidaritzapean, Aretxabaleta, Oñatiko Ganbara, Arrasateko Goikobalu eta Goikobalu Txiki, Azkoitiko Bizkargi, eta Leizarra musika eskola abesbatzak izango dira parte hartuko dutenak.
Hamar kantu inguru eskainiko dituzte Arantzazuko kontzertuan. Kooperatiben soinu banda jasotzen duen Humanity at music zortzi piezetako albumeko hiru kantu eskainiko dituzte, batetik: Banaketa, Internazionalizazioa eta Etorkizuna–, eta, bestetik, betiko Gabon kantak: Hator Hator, Olentzero, Oi Bethlem…
Asteazkenean elkartu ziren entsegu orokorra egiteko Arrasateko San Frantzisko elizan eta datorren igandean bilduko dira Aretxabaletan “Sapere aude Sinfonietta” musika taldearekin beste entsegu orokor bat egiteko.

Araitz Etxaniz eta Enaitz Alberdi, hirugarren Trikitilari gazteen txapelketan!

Zaldibar

Joan zen igandean, sei bikotek parte hartu zuten Euskal Herriko Trikitilari Gazteen XXVIII. Araitz Etxaniz trikitilari azkoitiarra eta Enaitz Alberdi panderojole azpeitiarra, hirugarren sailkatu ziren. Zaldibarren izan zen 13 eta 19 urte bitarteko trikitilarien txapelketa, eta parte-hartzaile guztiek porrusalda, fandangoa eta arin-arina jo behar izan zituzten. Honako hau da sailkapena:

Irati Arzelus eta Mirari Plazaola (132,35 puntu).
Ane Etxezarreta eta Sara Iriarte (132,1 puntu).
Araitz Etxaniz eta Enaitz Alberdi (119,5 puntu).
Ianire Segurola eta Elaia Diaz (114 puntu).
Eider Garro eta Araitz Elizalde (110,7 puntu).
Julen Labaka eta Garazi Larrañaga (109,45 puntu).

Zorionak guztiei!